• Eragile instituzional eta sektorialek parte hartu dute Euskadin zuraren sektorean prebentzio-kultura sustatzeko sinaduran
2022ko urriaren 10a.- 2019-2025eko Euskadiko Elikaduraren eta Zuraren Balio Katerako Laneko Segurtasun eta Osasunerako Estrategia Sektorialaren esparruan, Euskadipreben, eta basogintzan istripuen prebentzioa bultzatzeko helburuarekin, Eusko Jaurlaritzak, Bizkaiko, Arabako eta Gipuzkoako Foru Aldundiek, Lanbidek, Hazik, Neikerrek eta Baskegurrek konpromiso batzuk sinatu dituzte Euskadiko elikaduraren eta zuraren balio-kate osoan prebentzio-kultura eta ”zero” ikuspegia ezartzeko: zero istripu hilgarri sektorean, eta istripu eta gaixotasun profesionalen % 15 murriztea prebentzio-neurriak aplikatuz, bizitza- eta lan-baldintzak hobetuz eta arriskuen gobernantza egokia sustatuz.
Sinadura, urriaren 10ean egin zena Neikerren Arkauteko instalazioetan, OSALANek eta Eusko Jaurlaritzako Nekazaritza, Arrantza eta Elikadura Politikako Sailburuordetzak elkarrekin egindako ekimena da. Ekimenak euskal erakundeek lan-ingurune seguru, osasungarri eta iraunkorrak lortzeko duten konpromiso irmoa erakusten du, lehen sektorearen eta haren balio-katearen erreferentzia eta bereizgarri gisa Euskadin.
“Tamalez, azken aldi honetan ikusi dugu istripu hilgarriak gertatu direla eta horiekin batera pertsonen sufrimendua basogintza-sektoreko familian. Sektoreen eta erakundeen arteko esparru bateratuan garatutako jarduera-ildoen apustu horren helburua da ezohiko egoera hori iraultzea eta sektoreak kalitatezko lana eta produktuak eskainiz gozatzea”, adierazi du Elena Pérez Barrredo Lan eta Gizarte Segurantzako sailburuordeak.
Bittor Oroz Izagirre Nekazaritzako, Arrantzako eta Elikagai Politikako sailburuordearen hitzetan, “ezinbestekoa da ikuspuntu holistikotik eta elkarrekin jarduketak egitea. Guztion artean gai izan behar dugu sentsibilitatez eta kontzientzia osoarekin jarduteko esparru sektorialean, bai eta gizarte gisa ere, oro har. Irizpidez jokatu behar dugu, eta guztiontzako osasun-kulturarekin lan egiten duen sektore baten aldeko apustua arautu.”
2022-2024 bitarteko Basogintzako istripu larri eta hilgarrien prebentziorako jarduketa-ildoak
Ekitaldia “2022-2024 bitarteko Basogintzako istripu larri eta hilgarrien prebentziorako jarduketa-ildoak” aurkezteko aurrez aurreko jardunaldiaren barruan egin da. Bertan, Bittor Oroz Izagirre Nekazaritza, Arrantza eta Elikagai Politikako sailburuordeak eta Elena Pérez Barrredo Lan eta Gizarte Segurantzako sailburuordeak parte hartu dute, bai eta erakunde sinatzaileen hainbat ordezkarik ere.
Ildo horiek zuraren sektorean datozen bi urteetarako arriskuen prebentziorako politiken zuzendaritza markatuko dute, eta erronka estrategiko eta beharrezko gisa eragile instituzionalen eta sektorialen lankidetza txertatuko dute.